Облыстық денсаулық сақтау басқармасының басшысы С.Б. Пазиловтың және басқарма басшысының ана мен бала денсаулығы жөніндегі орынбасары М. М. Мирзанованың қатысуымен 31 қаңтарда облыстық перинаталдық орталығында есеп беру жиналысы өтті. Облыстық перинаталдық орталығының бас дәрігері О.В. Ким және бас дәрігердің орынбасарлары 2021 жылдың жұмысы бойынша есеп берді. Баяндамашылар атқарылған жұмыстар мен алдағы жоспарларға кеңінен тоқталып, қойылған сұрақтарға толық жауап берілді. Жиналыс барысында айтылған шаралар есебіне қатысты облыстық денсаулық сақтау басқармасының басшысы С.Б. Пазилов жалпы оң бағасын беріп, келесі жылғы жоспарға атқарылатын жұмыстарды енгізу туралы айтылды.
Айта кету керек, 2021 жылы Облыстық перинаталдық орталығында Дүниежүзілік денсаулық сақтау ұйымы, Біріккен Ұлттар Ұйымының Балалар қоры (ЮНИСЕФ) ұсынған «Ана сүтімен қоректендіруді қорғау, қолдау және насихаттау» бағдарламасы бойынша 2021 жылдың наурыз айында ресертификациядан өтіп, «Балаларға мейірімді аурухана» мәртебесін алдық.
Қыркүйек айында Облыстық перинаталдық орталығы Ұлттық аккредитациядан сәтті өтіп, бірінші санатқа ие болды. Аккредитация перинаталдық орталықтың денсаулық сақтау мекемелеріндегі стандарттарға сәйкес жұмыс атқаратынын растады. Медициналық көмектің барлық құрамдас бөліктері бағаланды – материалдық қамтамасыз етуден, тікелей емдеу сапасынан қызметкерлердің этикалық нормаларды сақтауына дейін. Комиссияның қорытындысы перинаталдық орталықта емделушілерге барлық белгіленген талаптарға сай сапалы қызмет көрсетілетінін көрсетеді. Бұл – бүкіл ұжымның, барлық бөлімше қызметкерлерінің, медицина қызметкерлерінің де, медициналық емес қызметкерлердің де еңбегі.
Облыстық перинаталдық орталығында 2021 жылы 12349 нәресте дүниеге келді. Бұл 2020 жылмен салыстырғанда 693 нәрестеге көбірек. Оның ішінде 6332 (51,3%) – ер бала, 6017 (48,7 %) – қыз бала, оның ішінде 158 егіз және 1 үшем. 2020 жылмен салыстырғанда экстремальды аз салмақтағы нәрестелер мен өте аз салмақты нәрестелер өмір сүру деңгейі жоғарылап, сәби өлімі көрсеткіші төмендеді. Қазақстанның ДДҰ сәбидің тірі туу өлшемдерінің жаңа сатысына көшуімен 2008 жылдан бастап орталықта дене салмағы 500 грамнан басталатын жаңа туған нәрестелерді күту басталды. Осылайша, экстремальды аз салмақтағы нәрестелердің өмір сүру деңгейі биыл 26%-дан 50 % -ға жоғарылады. Ал, өте төмен салмақтағы нәрестелердің өмір сүру деңгейі биыл 81%-дан 86%-ға жоғарылады. Мамандарымыздың пікірінше, бұған ДДҰ-ның “Қауіпсіз ана болу”, “Ана сүтімен қоректендіруді қорғау, қолдау және насихаттау”, “Тиімді перинаталдық технологиялар” бағдарламаларын енгізу, сондай-ақ медициналық персоналдың біліктілігін үздіксіз арттыру, материалдық-техникалық базаны жақсарту және медициналық жабдықты сатып алу арқасында қол жеткізілді.
